عبد القادر بوراص – جريدة البديل السياسي
هذا نص القصيدة الزجلية التي ألقيتها في حفل تكريم المرأة البهيج، صباح يومه السبت 09 مارس 2024 بإعدادية 03 مارس بمداغ:
بِسْمْ اللهْ عْلِيكُمْ فْمَجْمَعْ لَحْبَابْ
إِدَارَة أساتِذَة وَتْلامَذْ نْجَابْ
وْجَمْعِيَّة بَرْجَالْها شْيُوخْ وَشْبَابْ
وَضْيُوفْ فَلْبَاسْ عَصْرِي وْتَقْلِيدِي وَجَلْبابْ
جَاوْ لَبَّاوْا النِّداءْ كُلْهُمْ وْرَدُّوا لْجَوابْ
يَوْمْ ثامِنْ مارِسْ حَفْلْ جَذَّابْ
فْضِيافْةْ إِعْدادِيَّة اسْتَقْبَلْتْنَا بْتَرْحَابْ
ثالِثْ مارِسْ فْمَداغْ اسْمْهَا مَكْتُوبْ عْلْبَابْ
تَكْرِيمْ لَمْرَا يَوْمْ مَشْهُودْ
وْلِعْتِرَافْ بَجْمِيلْهَا أَمْرْ مَحْمُودْ
وْدَوْرْهَا لَكْبِيرْ فَلْمُجْتَمَعْ كُلْنَا عْلِيهْ شْهُودْ
وْمَا يَنْكْرُوا غِيرْ جَاهَلْ جَحُودْ
يَا رَبِّي احْفَظْهَا مْنْ عِينْ لْحَاقَدْ لْحَسُودْ
لَمْرَا عَنْدْنَا فَالدَّالْيَة لْعَالْيَة عَنْݣُودْ
مْكَانَتْهَا كْبِيرَة نْدَافْعُو عْلِيهَا بَلْبَارُودْ
وْهِيَ قَلْعَة مْحَصْنَة وَحْنَا لِهَا جْنُودْ
هِيَ تَاجْ ثْمِينْ فُوقْ رْيُوسْنَا مَعْݣُودْ
الْوَاجَبْ فَالدَّارْ وْفَجْنَانْ لَا تَنْسَاهَا
لَمْرَا لْقَرَوِيَّة هَاذِي يَاللِّي مَا تَعْرَفْهَا
هْنَا وَلْهِيهْ نْهَارْ كُلُّو فَشْقَاهَا
مَا تْأَفَّفْ مَا تَزْعَفْ هَذَا شَانْهَا
لْجُودْ وَلْكَرَمْ خَدُومَة لَضْيَافْهَا
بَغْرِيرْ مْسَمَّنْ وْحَرْشَة مَحْلَاهَا
هِيَ طْبِيبَة وْمُمَرِّضَة وَاقْفَا لِيلْ وَنْهَارْ
فْخَدْمَةْ لْمَرْضَى تَجْرِي مَا كَايَنْ رُوطَارْ
هِيَ مُعَلِّمَة تْحَارَبْ لْجَهْلْ وَلْعَارْ
وْتَنَشَرْ لْعِلْمْ وَلْمَعْرِفَة وْلْأَنْوَارْ
وْهِيَ مُحَامِيَّة وَاقْفَا ضَدْ كُلْ حَڭَّارْ
دَّافَعْ عْلَى لْحَقْ بْصَوْتْ جَهَّارْ
وْهِيَ فَجْمِيعْ لْوَظَائِفْ لِهَا دْوَارْ
قَايْمَة بَلْوَاجَبْ مْڭَادْ بْلَا انْتِظَارْ
هِيَ مَصْدَرْ الرَّاحَة، السَّكِينَة وَالسَّكَنْ
وْتَحْتْ قْدَامْهَا جَنَّةْ عَدَنْ
كَلْمَةْ أُمْ يَا لْغَافَلْ عَضْ عْلِيهَا بَسْنَانْ
وَطْهَلَّا فَلْبَنْتْ الْأُخْتْ وَالزَّوْجَة فَالسَّرْ وَلْعَلَنْ
فْأََلْفْ تَحِيَّة لَّمْرَا فْعِيدْهَا ذَا نْهْارْ
فْلَمْدِينَة وَلْقَرْيَة وَالدُّوَارْ
وَسْتَرْهَا يَا رَبِّي لْعَالِي مَنْ لَشْرَارْ
وْكُنْ لِهَا مُعِينْ يَا حَكِيمْ يَا جَبَّارْ
تعليقات الزوار ( 0 )