حظك مع الكارطة

جريدة البديل السياسي:

مهند الشواف صاحب أكبر سر لعجائب الكارطة في حياتنا ومستقبلنا، وقد تعلم أسرار الحظ من الكارطة على يد الشوافة والحلايقية الروحانيين بمدينة مراكش،  ثم صقل موهبته من “قتيل القمارة”  المشعوذ سفيان عريجة ، وساعده أحد اليهود المغاربة في التعرف على وسائل الخداع والمكر لمعرفة حقائق الشخصية الانسانية من قواعد الكارطة، ويعد صاحب أول دعوة لتوحيد الشوافة الروحانيين بجمعية وطنية، وله مشروع رائد لإنشاء أكاديمية في قراءة الكف والأبراج والكارطة وأرقام الحظ  …وستعرفون ورقتكم عندما يذكر أصحاب الورقة بأول حرف أواشارات أخرى في أسمائهم بعد توزيعة (تتياك) الكارطة  …

اللاص : سميتكوم فيها الشين ولا الفاء … اصبروا و ازيدوا على صبركم راه ما كاين مع من… كاع اللي بغيتوا تحطوا عليه ايديكوم حتى هو بغى يديكوم… او ايلا كنتوا انتوما بغيتوا الخير فيهوم راه كلها وتيتحاسب على نيتوا .. والفاهم يفهم واللي ما قاريش يتهجى..

الضوص :اسميتكوم فيها الواو ولا الصاد … راه مساخيط الوالدين هم سببابكوم حتى تلفات ليكوم الجرية وما بقيتوش منتظمين ف العمل ديالكوم.. وايلا بغيتوا تعرفوا مساخيط الوالدين شوفوا غير العهود ديالهوم معاكم.. وايلا بقيتوا دايرين فيهم راه حتى انتوما غادي يشكوا فيكوم الناس..

التريس :  اسميتكوم  فيها الألف ولا الحاء… واش سحابكوم الراحة كاينة ف الدنيا وف الفلوس ديالها.. ايوا غير فكروا شوية وشوفوا هادوك اللي عندهوم الفلوس واش مرتاحين ولا لا .. الراحة كاينة ف العمل وف العلم وف الاجتهاد واخا تربح مع هادشي عشرة الدراهم ف النهار غادي ترتاح حينتاش الزريعة ديالها تتعطي على مدة كبيرة

الكواترو :اسميتكوم فيها الياء و لا الألف … نتمنى تآمنوا ايمان كبير بقاعدة قرءانية وغادي تعيشوا سعادة ما عمركوم تخايلتوها ف حياتكوم “وعسى أن تكرهوا شيئا وهو خير لكم” المهم ف هاد القاعدة هو ما تتعرضون له من أحداث ووقائع تتكرهوها وماشي هاداك الشي اللي تتكونوا سبب فيه بالإرادة ديالكم واختياركم..

السينكو : اسميتكوم فيها الراء ولا العين ..باش تعرفوا عاقبة الظلم وعاقبة التشجيع ديالو احسن مسلسل مصري خاصكوم تعرفوه هو “مرسي والسيسي” ايلا شفتوه غادي يبان ليكوم الفرق بين العدل والظلم والعلم والجهل والتنمية والتخلف والحق والباطل والقوة والضعف والصمود والانهزامية

السيس :سميتكوم فيها اللام ولا السين … الله يبعد بلانا على بلاكوم وجهكوم قاسح بغيتوها كلها وغادي تخليوها كلها أش داكوم لشي حاجة ما تتعرفوش ليها… اللهطة ديالكوم هي سبب خسارتكوم.. ايوا راجعوا نفوسكوم واتقنوا هاداكشب اللي تتعرفوا ليه قبل ما تنساوه..

السات :سميتكوم فيها الجيم ولا الضاد … ديما غادي توحلو غير مع البراهش.. ايلا ضحكتوا معاهوم يندموكوم … لعبتوا معاهوم يندموكوم … علمتوهوم شي حاجة يفهمو عليكوم.. الحل معاهموم بعدوا عليهوم.. وايلا قربوا ليكوم لهيوهوم قبل ما يلهيوكوم..

الصوطا :سميتكوم  فيها الهاء ولا الكاف .…تابقى فيا الحال ملي تنشوفكوم انتوما بالذات ما تتقاطعوش القناة البولية ديال دوزيم وقناة اتم المغربية حينتاش تينطبق عليكوم كلكم المثل المغربي “المكسي ما درا بالحافي والزاهي يضحك على الهموم” ايوا شوفو اش واقع ف سوريا والعراق واليمن واش تتشوفوا فدوزيم…

الكبال :سميتكوم فيها الغين ولا الدال … وا صايط ليكوم البرد ف راسكوم تيسحابكوم اللباس ودفوع البوزات هو المظاهر اللي غادي تخلي الناس يتقوا فيكوم .. راه حتى هوما فايقين وعايقين وتيكولوا على بحالكوم “النخوة عل الخوا ” حينتاش كلمة وحدة تخرج منكوم غادي تفضح الجهل ديالكوم…

الري :سميتكوم فيها الميم ولا الباء… تمنيت كن كانت عندكوم شي ارادة باش عل الأقل تشاهدوا مسرحية سيدي قدور العلمي راه فيها جواب تتقلبوا عليه هاد العام ومازال ما ارتاحت قلوبكوم لجميع الأجوبة اللي لقيتوها.. وايلا ما قدرتوش تصارحوا نفوسكوم حتى واحد ما يقدر يقنعكوم بشي حاجة